THE 
မင်္ဂလာပါ Blossoms လေးတို့ရေ။
အခုတလော အပြင်စာတွေစားပြီး နေမကောင်းဖြစ်၊ ရောဂါတွေရကြတဲ့ သတင်းတွေကို တွေ့မိကြားမိတယ်ဟုတ်။ အဲ့တာကြောင့်မို့ ဒီနေ့မှာတော့ Meditea အဖွဲ့ကနေပြီး အပြင်အစာကို ဘေးကင်းလုံခြုံအောင် စားသုံးနိုင်ဖို့ ဗဟုသုတလေးတွေ မျှဝေပေးသွားပါမယ်။
☤ ဆိုင်အဆင်၊ ရောဂါအပြင် ☤
Blossoms လေးတို့ရေ၊ ကိုယ့်အတွက် မကောင်းမှန်းသိလျက် ဆက်နေနေတာက အချစ်ရေးမှာရော ကျန်းမာရေးမှာရော မကောင်းပါဘူးနော်။ မသန့်ရှင်းတဲ့ စားသောက်ဆိုင်မှာ ကိုယ်က တွယ်ကပ်ပြီး စားသုံးနေရင်တော့ salmonella လို အစာအဆိပ်သင့်စေတဲ့ ဗက်တီးရီးယားမျိုး ကူးစက်ခံရနိုင်ပါတယ်။ နောက်ဆက်တွဲအဖြစ် ဖျားတာ၊ ဗိုက်အောင့်တာ၊ ဝမ်းပျက်ဝမ်းလျှောတာ စတာတွေဖြစ်နိုင်ပါတယ်။ အဲ့တာအပြင် ညစ်ညမ်းတဲ့ စားပွဲလို အရာဝတ္ထုမျက်နှာပြင်တွေကတဆင့် အရေပြားရောဂါတွေကူးစက်နိုင်ပါသေးတယ်။ လေဝင်လေထွက်မကောင်းပြီး ဖှုန်နဲ့ မှိုတွေစွဲကပ်နေတဲ့ ဆိုင်များမှ ပန်းနာရင်ကြပ် နဲ့ ချောင်းဆိုးရင်ကျပ်လို အသက်ရှူလမ်းကြောင်ဆိုင်ရာပြဿနာများ ကြုံတွေ့ရနိုင်ပါတယ်။ ဒါကြောင့်မို့ အပြင်စာသွားစားတော့မယ်ဆိုရင် ကိုယ်သွားမဲ့ဆိုင်ကို ရည်းစားရွေးသလို သေချာလေး ရွေးကြစို့နော်။
☤ စားသတိ၊ သွားသတိ ☤
အစားမတော် တစ်လုတ်၊ အသွားမတော် တစ်လမ်း ဆိုတဲ့အတိုင်းပဲ မစားသင့်တာလေးကို နည်းနည်းလေးစားမိရင်တောင် ကျန်းမာရေးကိုထိခိုက်နိုင်တာမို့ Blossoms လေးတို့တွေ အောက်မှာမျှဝေထားတဲ့ အချက်လေးတွေကို မှတ်သားထားသင့်ပါတယ်။
• ရေခဲကို အေးခဲလိုက်
Ready made ရေခဲထုပ်တွေအချို့နဲ့ ဖျော်ရည်ဆိုင် တော်တော်များများမှာသုံးတဲ့ ရေခဲတွေကို ဘာကရေနဲ့ပြုလုပ်ထားတယ်ဆိုတာ သေချာမသိနိုင်လို့ တတ်နိုင်သ၍ ရှောင်သင့်ပါတယ်။ အခုလို နွေရာသီလည်းရောက်ပြီဆိုတော့ ရေခဲစိမ်သောက်တာ ရေခဲရေသောက်တာမျိုးကို ပိုရှောင်သင့်တာပါတယ်။ နေပူထဲက ပြန်လာပြီးချိန်မှာ ရေခဲရေကို လုံးဝလုံးဝမသောက်ဖို့ တိုက်တွန်းပါတယ်နော်။
• အသုံးအဆောင်ကို သတိဆောင်
အပြင်မှာအစာမစားခင် ကိုယ်သုံးမှာ ဇွန်း၊ ခရင်း၊ တူ စတာတွေကို သန့်စင်ရဲ့လားလို့ကြည့်ပါ။ မသေချာရင် အသစ်တောင်းတာဖြစ်စေ၊ tissue အသန့်နဲ့သုတ်တာဖြစ်စေ လုပ်ပါ။ တစ်ခါသုံးဝါးတူကို အသုံးပြုတတ်သူတွေအနေနဲ့ တစ်ခါသုံးဝါးတူတွေထဲမှာ ချွတ်ဆေးရည် အောင်းနေပြီး
စားစရာရဲ့အပူနဲ့တွေ့တဲ့အခါ အစားအသောက်ထဲပျော်၀င်သွားနိုင်တာကြောင့် အရည်အသွေးမြင့်တဲ့ တစ်ခါသုံးတူ (တူနှစ်ချောင်းထိပ်ကို လက်နဲ့ခွာရတာမျိုး) ကိုရွေးချယ်ပါ။အကောင်းဆုံးကတော့ ကိုယ်ပိုင် portable chopsticks ကို ဘူးလေးနဲ့ သယ်ဆောင်သွားတာပါပဲ။
• မခွာရရင်ရှောင်၊ မခွာထားရင်ရှောင်
"Peel it, boil it or don't eat it." ဆိုတာ ကမ္ဘာပတ်ခရီးသွားတွေ ကျင့်သုံးတဲ့စကားဖြစ်ပါတယ်။ ပြင်ပပတ်၀န်းကျင် လေထဲက အညစ်အကြေးနဲ့ ထိတွေ့နေပြီး သန့်ရှင်းမှုမရှိတဲ့ ရေနဲ့ ဆေးထား အခွံမခွာဘဲ အပြင်လွှာကိုပါစားလို့ရတဲ့ စတော်ဘယ်ရီ၊ ဆလက်ရွက် လိုသီးနှံကိုရှောင်ပါတဲ့။ သန့်မသန့်မသေချာရင် ဒီလို အခွံမပါ အပြင်စာကို ရှောင်သင့်ပါတယ်။ အဲ့လိုပါပဲ အခွံကိုပါစားလို့ရတဲ့ ပန်းသီး၊ မာလကာသီး တို့လိုသီးနှံမျိုးကိုလည်း ဝယ်စားမယ်ဆို အခွံကို ခွာပြီးမှ စားသုံးသင့်ပြီး ခွာပြီးသားကို ဒီတိုင်းခင်ကျင်းရောင်းထားရင်လည်း ရှောင်သင့်ပါတယ်။
• ကိုယ့်အကြောင်းကိုယ်သိ
ကိုယ့်ခန္ဓာကိုယ်က ဘယ်အစားအစာတွေနဲ့မတည့်ဘူးလဲဆိုတာ ကိုယ်တိုင်အသိဆုံး မလို့ ထိုအစားအသောက်တွေကို ရှောင်ကြဉ်ပါ။ အစားအစာ အသစ်အဆန်းတွေ့ပြီး ကိုယ်နဲ့တည့်မတည့်မသေချာရင် ထိုအစာတွေကိုလည်း ရှောင်ပါ။ လူသိများတဲ့ မတွဲသင့်တဲ့အစားအစာတွေ (ဥပမာ နို့ + အချဉ်သီး၊ လက်ဖက်ရည် + သံဓာတ်ကြွယ်၀တဲ့ အသီးအနှံ) တို့ကို သတိမူပြီး မိမိကိုယ်ကို ကာကွယ်ရပါမယ်။ တန်ဆေးလွန်ဘေးဆိုသလိုပဲ တစ်ခုခုစားတော့မယ်ဆိုရင် ကြိုက်လို့ဆိုပြီး အများကြီးမစားပါနဲ့။ အချဥ်ပေါင်း ၁သောင်းဖိုးစားရင်တော့ ဝမ်းသွားမှာ ဧကန်ပါ။
☤ ကာကွယ်ပါ၊ ကုသပါ ☤
မဖြစ်ခင်တည်းက ကာကွယ်တာဟာ အထိရောက်ဆုံးဆေးပါ။ ဒါကြောင့်မို့ အပေါ်မှာပြောခဲ့သလိုပဲ ဆိုင်ရွေးတာကို ရည်းစားရွေးသလိုရွေးရပါမယ်။ ကိုယ့်ကို နားလည်ပေးနိုင်တဲ့ စိတ်ထားကောင်းတဲ့သူကိုမှ ရည်းစားအဖြစ်တွဲဖို့စဥ်းစားပေးသင့်သလိုမျိုး လေဝင်လေထွက်လည်းကောင်း၊ အလင်းရောင်လည်းကောင်းကောင်းရ၊ အညစ်အကြေး နဲ့ ဖုန်မှုန့်တွေ ပိုးမွှားတွေမရှိမှ အဲ့ဆိုင်ကို သွားရောက်အားပေးဖို့စဥ်းစားသင့်ပါတယ်။ ဘဝလက်တွဲဖော်အဖြစ်ရွေးမယ်ဆိုရင်တော့ စိတ်ထားကောင်းရုံနဲ့မရတော့ပါဘူး တခြားအချက်တွေကိုလည်းထည့်စဥ်းစားရပါတော့မယ်။ အဲ့လိုပဲ စားသောက်ဆိုင်တစ်ဆိုင်မှာ စားတော့မယ်ဆိုရင်တော့ ခုနကပြောတဲ့အချက်တွေအပြင်ကိုမှ ခြင်၊ ယင်တွေအနားမှာ ရှိ၊ မရှိကို လည်းကောင်း လက်အိတ်လို သန့်ရှင်းမှုအတွက် အသုံးပြုရမဲ့ တန်ဆာတွေကို သုံး၊ မသုံး ကို လည်ကောင်း ကြည့်ရှုဆုံးဖြတ်ရပါဦးမယ်နော်။
